Ash-Sharh

tafsīr · Ayatollah Makārim Shīrāzī

الشرح

سورہٴ الم نشرح

یہ سُورہ مکّہ میں نازل ہوا اِس میں ۸ آیات ہیں۔

سُورہ "الم نشرح" کے مضامین اور اس کی فضیلت

مشہور یہ ہے کہ یہ سُورہ، سُورہ والضحٰی کے بعد نازل ہوا ہے اور اس کے مضامین بھی اسی مطلب کی تائید کرتے ہیں، کیونکہ اس سُورہ میں بھی پھر سے پیغمبر اکرم صلی اللہ علیہ و آلہ وسلم پر خدا کی نعمتوں کے ایک حصہ کو شمار کیا گیا ہے۔ حقیقت میں تین قسم کی عظیم نعمتیں سُورہ والضحیٰ میں آئی تھی، اور تین ہی عظیم نعمتیں سُورہ الم نشرح میں آئی ہیں۔ گزشتہ نعمتوں میں تو بعض مادّی اور بعض معنوی تھیں، لیکن اس سُورہ کی تمام نعمتیں معنوی پہلو رکھی ہیں اور یہ سُورہ خصوصیت کے ساتھ تین محوروں کے گردش کرتا ہے: ایک تو انہی تینوں نعمتوں کا بیان ہے، دوسرا پیغمبر صلی اللہ علیہ و آلہ وسلم کو مستقبل میں ان کی دعوت کی مشکلات کے برطرف ہونے کے لحاظ سے بشارت ہے، اور تیسرا خداوند یگانہ کی طرف توجہ اور اس کی عبادت و بندگی کی طرف تحریص و ترغیب۔ اِسی بناء پر روایات اہل بیت میں۔۔۔ جیسا کہ ہم نے پہلے بھی اشارہ کیا ہے۔ یہ دونوں ایک ہی سورہ شمار ہوئی ہیں۔ اسی لئے قرأت نماز میں اسی بناء پر کہ ایک مکمل سُورت پڑھی جائے، دونوں کو اکھٹا پڑھتے ہیں۔ اہلِ سُنّت میں بھی بعض حضرات اسی نظریہ کے طرف دار ہیں جیسا کہ فخر رازی نے طاؤس اور عمر بن عبد العزیز سے نقل کیا ہے کہ وہ بھی یہی کہا کرتے تھے کہ یہ دونوں سورتیں ایک ہی سورت ہیں اور وہ ایک رکعت میں دونوں کو تلاوت کیا کرتے تھے، البتہ وہ ان دونوں کے درمیان بسم اللہ کو حذف کر دیتے تھے۔ (لیکن ہمارے فقہاء کے مطابق بسم اللہ دونوں میں ہونا چاہیئے، اور یہ جو مرحوم طبرسی نے مجمع البیان میں نقل کیا ہے کہ ہمارے فقہاء بسم اللہ کو خذف کر دیتے ہیں درست نظر نہیں آتا)۔ تعجب کی بات یہ ہے کہ فخر رازی ان لوگوں کا قول نقل کرنے کے بعد، جو ان دونوں کو ایک سُورہ کہتے ہیں، کہتا ہے کہ یہ بات ٹھیک نہیں ہے کیونکہ ان دونوں کے مضامین ایک دوسرے سے مختلف ہیں۔ سُورہ والضحیٰ اس وقت نازل ہوا جب رسولِ خدا صلی اللہ علیہ و آلہ وسلم کفّار کی اذیّت رسانی پریشا ن تھے اور زندگی سختی اور غم و اندوہ میں بسر کر رہے تھے، حالانکہ دوسری سُورت اس وقت نازل ہوئی جب کہ پیغمبرؐ خوش حال و شادمان تھے، تو یہ دونوں چیزیں ایک دوسرے کے ساتھ کیسے جمع ہو سکتی ہں؟ (بحوالہ: "تفسیر فخر رازی" جلد۳۲، ص۲)۔ لیکن یہ استدلال عجیب ہے کیونکہ دونوں سورتیں پیغمبر کی گزشتہ زندگی کی بات کر رہی ہیں، اور اس وقت کی بات ہے جبکہ آپ بہت ہی مشکلات کو پیچھے چھوڑ چکے تھے، اور آپؐ کا پاک دل امید و سرور میں غرق تھا۔ یہ دونوں سُورتیں خدا کی نعمتوں کی بات کر رہی ہیں، اور سختی اور مشکلات سے پُر ماضی کی یاد دلا رہی ہیں، تاکہ پیغمبرؐ کے دل کی تسلی اور زیادہ سے زیادہ کامل اُمید کا باعث ہو۔ بہرحال، ان دونوں سورتوں کے مضامین کا قریبی تعلق ایسی چیز نہیں ہے جو شک اور تردید کے قابل ہو، اسی معنی کی نظیر سُورہ فیل اور سُورہ قریش میں بھی آئے گی۔ انشاء اللہ۔ اس بارے میں کہ یہ سُورہ (الم نشرح) مکہ میں نازل ہوا ہے یا مدینہ میں، اُوپر بیان سے واضح ہو جاتا ہے کہ یہ مکّہ میں نازل ہوا ہے، لیکن آیہ (وَوَضَعْنَا عَنكَ وِزْرَكَ): "ہم نے تیرے ذکر کو بلند کیا" کی طرف توجہ کرتے ہوئے بعض کا نظریہ یہ ہے کہ یہ مدینہ میں نازل ہوا ہے، اس وقت جب کہ اسلام اور پیغمبر اسلام صلی اللہ علیہ و آلہٖ وسلم کی شہرت چاروں طرف پھیل چکی تھی۔ لیکن انصاف یہ ہے کہ یہ دلیل اطمنان بخش نہیں ہے کیونکہ پیغمبرؐ کی شہرت ان تمام مشکلات کے باوجود، جو آپ کو مکہ میں درپیش تھیں۔ ہر طرف پھیل چکی تھی، اور تمام محفلوں میں آپ کے قیام، رسالت اور دعوت کے بارے میں چرچے ہو رہے تھے اور حج کے سالانہ اجتماع کے ذریعے یہ شہرت حجاز کے دوسرے علاقوں خصوصاً مدینہ میں پہنچ چکی تھی۔ اس سُورہ کی تلاوت کی فضیلت کے سلسلے میں ایک حدیث میں پیغمبر اکرم صلی اللہ علیہ و آلہ وسلم سے منقول ہوا ہے کہ آپؐ نے فرمایا: "من قرأھا اعطی من الاجرکمن لقی محمداً (ص) مغتماً ففرج عنہ" "جو شخص اس سُورہ کو پڑھے اس کو اس شخص کا اجر ملے گا جس نے محمّد (صلی اللہ علیہ و آلہٖ وسلم) کو غمگین دیکھا اور آپؐ کے قلبِ مبارک سے غم و اندوہ کو دُور کیا ہو۔" (بحوالہ: "مجمع البیان" جلد۱۰، ص ۵۰۷)۔

94:1

أَلَمۡ نَشۡرَحۡ لَكَ صَدۡرَكَ

کیا ہم نے تیرے سینہ کو کشادہ نہیں کیا؟