An-Nahl

tafsīr · Ayatollah Makārim Shīrāzī

النحل

سوره نحل

اس کی ۱۲۸ آیات ہیں اِس کا کچھ حصّہ مکّی ہے اور کُچھ مدنی

اِس سُورہ کے مضامین

اگرچہ بعض مفسرین اس سورہ کی تمام آیات کو مکّی سمجھتے ہیں لیکن زیادہ تر مفسرین کا نظریہ یہ ہے کہ اس کی کچھ آیات مکّہ میں نازل ہوئیں اور کچھ مدینہ میں۔ مکّی اور مدنی سورتوں کے جیسے مضامین ہوتے ہیں انہیں پیشِ نظر رکھتے ہوئے یہی بات زیادہ صحیح معلوم ہوتی ہے خصوصا اس کی بعض آیات میں صراحت سے ہجرت اور جہاد کی بات کی گئی ہے۔ مثلاً یہ ۴۱: والذين هاجروا في الله۔۔۔۔۔۔ اسی طرح آیہ ۱۰۱: ثمّ انّ ربّک للّذین ھاجروا من بعد ما فتنوا ثمّ جاھدوا فصبروا۔۔۔ ہم جانتے ہیں کہ یہ دونوں موضوعات ہجرتِ پیغمبرص کے بعد سے مناسبت رکھتے ہیں اور اگر آیہ ۴۱ میں ذکرِ حجرت کو جعفر بن ابی طالب کی سربراہی میں مسلمانوں کی پہلی ہجرت یعنی ہجرتِ حبشہ کی طرف اشارہ سمجھا جائے تو آیت ۱۰۱ میں تو ہجرت اور جہاد دونوں کا اکٹھا ذکر آیا ہے۔ بہت بعید ہے کہ یہ پہلی ہجرت کی طرف ہو۔ اس آیت کو رسول اللہ کی ہجرتِ مدینہ کے علاوہ کسی اور پر منطبق نہیں کیا جا سکتا۔ علاوہ ازیں آیہ۱۲۶: وإن عاقبتم فعاقبوا بمثل ما عوقبتم به۔۔۔۔۔۔ کی تفسیر میں مشہور ہے کہ یہ جنگ احد کے بارے میں نازل ہوئی ہے اور جنگِ احد ہجرت کے بعد ہوئی ہے۔ ان وجوہ کی بناء پر بعض مفسرین نے کہا ہے کہ اس سورہ کی ابتدائی چالیس آیات تو مکہ میں نازل ہوئی ہیں اور باقی آیات مدینہ میں جبکہ بعض دیگر حضرات اس کی تین آیات کے علاوہ باقی سب آیات کو مکّی سمجھتے ہیں اور تین آیات کو وہ جنگ احد کے سلسلے میں سمجھتے ہیں۔ امرِ مسلّم یہ ہے کہ اس سورہ کو مکی اور مدنی آیات کا مرکب سمجھا جائے۔ اگرچہ چند آیات کے سوا ہر آیت کے بارے حتمی طور پر نہیں کہا جا سکتاکہ یہ مکی ہے یا مدنی۔ بہرحال اس سورہ کی آیت میں مکی سورتوں کی سی مخصوص بحث بھی نظر آتی ہے مثلاً توحید اور معاد کے بارے میں بحثِ قاطع اور شرک و بت پرستی سے سخت مقابلہ نیز مدنی سورتوں کی سی مخصوص بحث بھی موجود ہے مثلاً جتماعی و معاشرتی احکام اور جہاد و ہجرت سے مربوط مسائل۔ مجموعی طور پر کہا جا سکتا ہے کہ اس سورہ کے مضامین دلکش اور مناسب انداز میں آپس میں مِلے جلے ہوئے ہیں۔ مضامین کے مشتملات کچھ اس طرح سے ہیں: ۱۔ اس سورہ میں سب سے زیادہ نعمات الٰہی کے بارے میں بحث کی گئی ہے اس سلسلے میں ایسی تفصیلات بیان کی گئی ہیں کہ ہر انسان کے اندر احساسِ شکر گزاری بیدار ہو جاتا ہے اور اس طرح انسان ان سب نعمات کے خالق کے زیادہ نزدیک ہو جاتا ہے۔ یہ نعمات ہیں: بارش، نورِ آفتاب، طرح طرح کے پودے، پھول، پھل، میوے اور دیگر غذائی مواد۔ اسی طرح جانور کہ جو انسان کے خدمت گزار ہیں، منافع اور برکات کہ جو حیوانات سے انسان کو پہنچتے ہیں اور مختلف قسم کے وسائل و اسباب زندگی۔ یہاں تک کہ اولاد اور بیوی کی نعمت۔ مختصر یہ کہ طرح طرح کے "طیّبات"۔ اسی وجہ سے بعض اس سورہ کو "سورہ نعم [نعمت کی جمع]" کہتے ہیں لیکن اس کا مشہور نام وہی "سورہ نحل"ہے۔ کیونکہ خداوند تعالیٰ کی گوناگوں نعمتوں کو شمار کرتے ہوئے اس میں شہد کی مکھّی کی طرف بھی ایک معنی خیز اور عجیب و غریب اشارہ کیا گیا ہے۔ خصوصا اس سے انسان کو حاصل ہونے والی اہم غذا کے حوالہ سے نیز اس کی طرف حشرہ کی زندگی میں جو توحید کی نشانیاں موجود ہیں ان کی طرف اشارہ کیا گیا ہے۔ ۲۔ اس سورہ کا دوسرا موضوعِ کلام توحید، خلقتِ خدا کی عظمت، معاد اور مشرکین اور مجرمین کو تہدید ہے۔ ۳۔ اس سورہ کا ایک اور حصّہ اسلام کے مختلف احکام مثلاً عدل و احسان، ہجرت و جہاد، فحشاء، منکر کی نہی اور ظلم و پیمان شکنی کی ممانعت پر مشتمل ہے۔ اسی طرح نعمتِ الٰہی کی شکرگزاری کی دعوت دی گئی ہے نیز اس سلسلےمیں توحید کے ہیرو حضرت ابراہیم ع کا ذکر ایک شکر گزار بندے کی حیثیت سے کیا گیا ہے۔ ۴۔ گفتگو کا ایک پہلو مشرکین کی بدعات کے بارے میں ہے اور اس سلسلے میں کئی ایک جاذب نظر سی مثالیں ذکر کی گئی ہیں۔ ۵۔ نیز اس سورہ میں انسانوں کو شیطانی وسوسوں سے ڈرایا گیا ہے۔

اس سوره کی فضیلت

پیغمبر اکرم صلی اللہ علیہ وآلہ وسلّم سے منقول بعض روایات میں ہے کہ آپ نے فرمایا: من قراٰھا لم یحاسبہ اللہ تعالی بالنعم الّتی انعمھا علیہ فی دار الدنیا جو شخص اس سورہ کو پڑھے گا خدا تعالی اس جہاں میں اسے بخشی گئی نعمتوں کا حساب نہیں لے گا [مجمع البیان جلد ۶ ص ۳۴۷]۔ واضح ہے کہ ان آیات کی تلاوت کے جن میں نعمات الھی کا اہم حصّہ بیان ہوا ہے اگر فکر و نظر کے ساتھ ہو تو یہ عزم، عمل اور شکر گزاری کا سبب بن جاتا ہے اور پھر اس کے نتیجے میں انسان ہر نعمت کو ٹھیک اسی مقصد کے لیے صرف کرے گا جس کے لیے وہ پیدا کی گئی ہے لہذا اس کے بعد اس سے کیسے یہ حساب لیا جائے کہ اس نے نعمت کو بجا صرف نہیں کیا۔

16:1

أَتَىٰٓ أَمۡرُ ٱللَّهِ فَلَا تَسۡتَعۡجِلُوهُۚ سُبۡحَٰنَهُۥ وَتَعَٰلَىٰ عَمَّا يُشۡرِكُونَ

(مشرکوں اور مجرموں کی سزا کے بارے میں )حکم خدا پہنچ گیا ہے۔ اس کیلئے جلدی نہ کرو۔ خدا اس سے منزہ و برتر ہے کہ اس کیلئے شریک قرار دیئے جائیں۔

تفسیر

Tafsīr Nemūna · Vol. 3

تفسیر آیت 2 کے تحت ملاحظہ کریں۔

16:2

يُنَزِّلُ ٱلۡمَلَـٰٓئِكَةَ بِٱلرُّوحِ مِنۡ أَمۡرِهِۦ عَلَىٰ مَن يَشَآءُ مِنۡ عِبَادِهِۦٓ أَنۡ أَنذِرُوٓاْ أَنَّهُۥ لَآ إِلَٰهَ إِلَّآ أَنَا۠ فَٱتَّقُونِ

روح الٰہی کے ساتھ ملائکہ کو اپنے حکم سے اپنے بندوں میں سے جس پر چاہے نازل کرتا ہے (اور انہیں حکم دیتا ہے کہ لوگوں کو ڈرائیں اور( ان سے کہیں کہ) میرے علاوہ کوئی معبود نہیں ہے لہٰذا میرے (حکم کی) مخالفت سے بچو۔

حکمِ عذاب قریب ہے

Tafsīr Nemūna · Vol. 3

جیسا کہ پہلے کہا چکا ہے کہ اس سورہ کی ابتدائی آیات کا اہم حصّہ مکّہ میں نازل ہوا ہے۔ یہ وہ دن تھے جب پیغمبر اسلام ص کو مشرکوں اور بت پرستوں کی طرف سے شدید الجھاو اور سختی کا سامنا تھا۔ ہر روز وہ آپ کی حیات آفریں اور آزادی بخش دعوت کے خلاف کوئی نیا بہانہ تراشتے۔ ان میں سے ایک یہ تھا کہ جس وقت رسول اکرم ص انھیں عذاب الٰہی کی تہدید کرتے تو بعض ہٹ دھرم کہتے کہ اگر یہ عذا ب اور سزا جس کی دھمکی دیتے ہو سچ ہے تو پھر وہ ہم پر نازل کیوں نہیں ہوتا اور شاید کبھی مزید کہتے کہ اگر فرض کیا عذاب آیا بھی تو ہم بتوں کا دامن تھام لیں گے۔ تاکہ وہ بارگاہ الٰہی میں سفارش کریں کہ وہ ہم سے عذاب اٹھا لے کیا وہ اس کی بارگاہ کے شفیع نہیں ہیں۔ اس سورہ کی پہلی آیت ان اوہام پر خط بطلان کھینچتے ہوئے کہتی ہے: جلدی نہ کرو۔ مشرکوں اور مجرموں کی سزا کے بارے میں حکم الٰہی یقینا پہنچ چکا ہے (أتى أمر الله فلا تستعجلوه) اور اگر تمہارا خیال ہے کہ بت اس کی بارگاہ کے سفارشی ہیں تو تم سخت غلطی اور اشتباہ میں۔ خدا اس سے منزہ اور برتر ہے کہ جسے تم اس کا شریک بناتے ہو(سبحانه وتعالى عما يشركون)۔ لہٰذا اس آیت میں”امر اللہ“ مشرکین کے لئے عذاب کے بارے میں حکم خدا کی طرف اشارہ ہے اور لفظ ”اتٰی“ اگر چہ فعل ماضی ہے اور گزشتہ زمانے میں اس حکم کے تحقق کی نشاندہی کرتا ہے لیکن اس کا مفہوم مضارع ہے اور یہ اس طرف اشارہ ہے کہ یہ حکم یقینا اور قطعاً تحقق پذیر ہو گا۔ ایسا قرآن میں کثرت سے ہے کہ قطعی الوقوع صیغہ مضارع ماضی کےساتھ ذکر ہوا ہے۔ بعض مفسرین نے یہ احتمال بھی ذکر کیا ہے کہ”امر اللہ“ خود عذاب کی طرف اشار ہ ہے نہ کہ حکم عذب کی طرف۔ بعض نے اس سے ”روز قیامت“ مراد لیا ہے۔ لیکن جو تفسیر ہم نے بیان کی ہے وہ زیادہ صحیح معلوم ہوتی ہے۔ نیز اللہ تعالیٰ کی طرف سے کوئی عذاب اور سزا کا فی دوافی بیان اور عادلانہ اتمام حجت کے بغیر نہیں ہے لہٰذا بعد والی آیت میں مزید فرمایا گیا ہے: خدا ملائکہ کو خدائی روح کے ساتھ حکمِ الٰہی کے ہمراہ اپنے بندوں میں سے جس پر چاہتا ہے نازل کرتا ہے(ينزل الملائكة بالروح من أمره على من يشاء من عباده ["من امر" میں "من" ب کے معنی میں ہے اور یہاں سببّیت کے معنی دیتا ہے۔ ]) اور انھیں حکم دیتا ہے کہ لوگوں کو ڈراو، شرک و بت پرستی پر متنبہ کرو اور کہو کہ میرے علاوہ کوئی معبود نہیں ہے (أن أنذروا أنه لا إله إلا أنا)۔ لہٰذا صرف میری نافرمانی سے ڈرو اور میرے سامنے احساسِ ذمہ داری کرو(فاتقون)۔ اس آیت میں روح سے کیا مراد ہے؟ اس سلسلے میں مفسرین میں بہت اختلاف ہے لیکن ظاہر یہ ہے کہ اس سے مراد وحی، قرآن اور نبوت ہے کہ جو انسانوں کی زندگی کا باعث ہے اگرچہ بعض مفسّرین نے یہاں وحی کو قرآن سے اور دونوں کو نبوت سے جدا کیا ہے اور انھیں تین تفاسیر کی شکل میں بیان کیا ہے لیکن ظاہر یہ ہے کہ یہ سب ایک ہی حقیقت کی طرف لوٹتے ہیں۔ بہرحال، ”روح“ یہاں معنوی اور روحانی پہلو سے ہے اور ہر اس چیز کی طرف اشارہ ہے جو دلوں کی زندگی کا سبب ہیں اور نفوس کی تربیت اور عقلوں کی ہدایت کا باعث ہے جیسا کہ سورہ انفال کی آیہ ۲۴ میں ہے۔ يا أيها الذين آمنوا استجيبوا لله وللرسول إذا دعاكم لما يحييكم ۖ اے ایمان والو! خدا اور اس کے رسول کی دعوت قبول کرو۔ جبکہ وہ تمہیں ایسی چیز کی طرف پکارتے ہیں جو تمہاری زندگی کا باعث ہے۔ سورہ مومن کی آیت ۱۵میں ہے: یُلْقِی الرُّوْحَ مِنْ اَمْرِہٖ عَلٰی مَنْ یَّشَآءُ مِنْ عِبَادِہٖ وہ اپنے بندوں میں سے جس پر چاہتا ہے اپنے حکم سے روح القاء کرتا ہے۔ نیز سورہ شوریٰ کی آیہ ۵۲ میں ہے۔ وكذلك أوحينا إليك روحا من أمرنا ۚ ما كنت تدري ما الكتاب ولا الإيمان اس طرح ہم نے اپنے حکم سے تجھ پر روح کو وحی کیا اس سے پہلے کتاب و ایمان سے آگاہ نہ تھا۔ واضح ہے کہ ان آیات میں ”روح“ قرآن، مضامین وحی اور فرمانِ نبّوت کے معنی میں ہے اگر چہ روح قرآن کی دیگر آیات میں اور معانی میں بھی آیا ہے لیکن ان مذکورہ قرائن کی طرف توجہ کرتے ہوئے زیر بحث آیت میں روح کا مفہوم قرآن اور مضمونِ وحی ہے۔ اس نکتے کا ذکر بھی بہت ضروری ہے کہ ”علیٰ من یشاء من عبادنا“ (اپنے بندوں میں سے جس پر چاہے) کا ہرگز یہ مطلب نہیں کہ وحی و نبی کی نبوت بغیر کسی حساب کتاب کے ہے کیونکہ مشیت الٰہی کبھی اس کی حکمت سے جدا نہیں ہوتی اور حکیم ہونے کے تقاضا سے وہ یہ انعام اسے عطا کرتا ہے جواس کا اہل ہو۔ ارشاد الٰہی ہے۔ اللہ اعلم حیث یجعل رسالتہ خدا بہتر جانتا ہے کہ اپنی رسالت کہاں قرار دے (انعام ۱۲۴) یہ نکتہ بھی نظر سے اوجھل نہ رہے کہ اگر انبیاء کے لئے پہلا فرمان الٰہی " ان انذروا " (ڈراو) ہے کہ اس کی وجہ یہ ہے کہ ایک گمراہ اور آلوشرک وفساد قوم کو بیدا ر کرنے کے لئے انذار سے بڑھ کر موثر کوئی چیز نہیں۔۔۔انذار۔۔۔ بیدار کرنے والا۔ آگاہ کرنی والا اور حرکت آفرین۔ یہ ٹھیک ہے کہ انسان نفع کا طالب اور نقصان پسند نہیں کرتا لیکن تجربہ نشاندہی کرتا ہے کہ تشویق کا اثر آمادہ افراد پر زیادہ ہوتا ہے جب کہ آلودہ افراد پر تہدید کا اثر بہت ہوتا ہے اور ابتدائے نبوت میں انداز اور ڈرانے والے امور ہونے چاہیئیں۔

16:3

خَلَقَ ٱلسَّمَٰوَٰتِ وَٱلۡأَرۡضَ بِٱلۡحَقِّۚ تَعَٰلَىٰ عَمَّا يُشۡرِكُونَ

اس نے آسمانوں اور زمین کو حق کے ساتھ پیدا کیا ہے اور وہ اس سے بالاتر ہے کہ اس کیلئے شریک بنائیں۔